Umukinnyi w’ikipe y’igihugu ya Misiri, Mohamed Salah, ukinira Liverpool FC, yatangaje ko azatandukana n’iyi kipe mu mpera z’uyu mwaka w’imikino wa 2025–2026.
Aya makuru yemejwe n’ibitangazamakuru bikomeye birimo BBC ndetse n’umunyamakuru wizewe mu makuru y’igura n’igurisha ry’abakinnyi Fabrizio Romano.
Salah w’imyaka 33 y’amavuko yageze muri Liverpool mu 2017 avuye muri AS Roma, aho yahise aba umwe mu bakinnyi ngenderwaho muri iyi kipe. Mu gihe amaze ayikinira, yabaye inkingi ya mwamba mu gutwara ibikombe bitandukanye.
Mu byo yagezeho harimo igikombe cya Premier League cya 2019–2020, UEFA Champions League ya 2018–2019, FA Cup ndetse na Community Shield, n’ibindi byinshi byatumye yandika amateka muri iyi kipe.
Inkuru zo kuba ashobora kuva muri Liverpool si nshya, kuko zatangiye kuvugwa umwaka ushize, aho amakipe yo muri Saudi Arabia yavugwaga ko amwifuza. Hari kandi n’amakuru yavugaga ko umubano we n’umutoza Arne Slot utari umeze neza.
Naramuka avuye muri Liverpool, azasigarq ari umwe mu bayifashije kugera ku rwego rwo hejuru ku mugabane w’u Burayi no mu Bwongereza kubera ibikombe yayifashije gutwara mu bihe bitandukanye. Mu bakinnyi bake basigaye muri icyo gisekuru, harimo kapiteni Virgil van Dijk na Andrew Robertson bari bahari Liverpool itwara ChampionsLegue.
Abakunzi ba Liverpool bategereje kureba aho Salah azakomereza umwuga we, ndetse n’icyo iyi kipe izakora mu gusimbuza uyu mukinnyi wagize uruhare rukomeye mu mateka yayo ya vuba.
NIYONZIMA Jean Bosco/TheKaminuzaStar