Rutahizamu w’ikipe y’igihugu ya Misiri na Liverpool Mohamed Salah yaraye yanditse amateka mashya yo kuba Umunya-Afurika wa mbere utsinze ibitego 50 mu irushanwa rya UEFA Champions League, ashimangira ubuhangange bwe muri iri rushanwa rikomeye ku mugabane w’u Burayi.
Uyu mukinnyi yageze kuri uyu musaruro kuri uyu wa Gatatu tariki 18 Werurwe 2026, mu mukino Liverpool yatsinzemo Galatasaray ibitego 4-0, aho Salah na we yinjije igitego cyamufashije kuzuza ibitego 50 muri Champions League.
Ibi byatumye ahigika abandi bakinnyi bakomoka muri Afurika barimo Didier Drogba, Samuel Eto’o na Riyad Mahrez, bari basanzwe bafite amateka akomeye muri iri rushanwa gusa kuri ubu yamaze kubatambukaho.
Salah w’imyaka 33 yinjiye muri Liverpool mu 2017, aho amaze kuyikinira imikino 82 ya Champions League, atsinda ibitego 50 ndetse anatanga imipira yavuyemo ibitego 18 (assists), bikomeza kumushyira mu bakinnyi b’ibihe byose b’ingenzi muri iri rushanwa mu mateka yaryo n’aya Liverpool.
Nyuma y’igihe hari ibivugwa ko umubano we n’umutoza Arne Slot utameze neza bigaragara ko ubu ibintu byifashe neza hagati yabo, ndetse bikaba binagaragarira no ku musaruro mwiza ikipe imaze iminsi ibona bitandukanye no mu bihe byashize aho yatakazaga umusubirizo.
Nyuma yo kunyagira Galatasaray, Liverpool yakomeje muri ¼ cya Champions League, aho izahura na Paris Saint-Germain yasezereye Chelsea iyinyagiye bikomeye ku giteranyo cy’ibitego 8-2 mu mikino yombi.
NIYONZIMA Jean Bosco/TheKaminuzaStar