Perezida w’ikipe ya FC Barcelona, Joan Laporta, yongeye gutorerwa kuyiyobora nyuma yo gutsinda uwo bari bahanganye Victor Font mu matora yabaye kuri iki Cyumweru tariki 15 Werurwe 2026.
Aya matora yabereye mu mujyi wa Barcelona ku kibuga cya Spotify Camp Nou, aho abanyamuryango b’iyi kipe bitabiriye igikorwa cyo gutora umuyobozi mushya uzayiyobora mu myaka itanu iri imbere.
Laporta yatsinze ku majwi 32,943 bingana na 68.18% by’abatoye bose, mu gihe Victor Font yabonye amajwi 14,385 angana na 29.78%. Hari kandi amajwi 984 yabaye imfabusa. Iyi ntsinzi ituma Laporta akomeza kuyobora iyi kipe mu yindi manda y’imyaka itanu.
Nyuma yo gutangazwa nk’uwatsinze, Laporta yavuze ko yishimiye icyizere abanyamuryango bongeye kumugirira, ashimangira ko agiye gukomeza gukorera ikipe kugira ngo igere ku musaruro wisumbuyeho. Yagize ati: “Iyi ntsinzi iraduha imbaraga zo gukomeza gukora cyane. FC Barcelona ni ikipe ikomeye, kandi tuzakomeza kuyubaka kugira ngo igire imyaka myiza imbere.”
Yakomeje ashimira abanyamuryango bitabiriye amatora, avuga ko ari ikimenyetso cya demokarasi n’umuco wa Barcelona, aho buri munyamuryango agira uruhare mu gutora umuyobozi w’ikipe.
Aya matora yanahuriranye n’intsinzi ya FC Barcelona muri La Liga, aho yatsinze Sevilla FC ibitego 5-2. Nyuma y’umukino, bamwe mu bakinnyi ndetse n’umutoza Hansi Flick na bo bagaragaye mu batoye.
Icyakora hari inkuru yababaje bamwe mu bafana, aho umunyezamu Marc-Andre ter Stegen, uri mu ntizanyo muri Girona FC, yaje gutora ariko ntiyisanga ku rutonde rw’abemerewe gutora ahita asubirayo adatoye.
Joan Laporta wavutse ku wa 29 Kamena 1962 agiye kuyobora FC Barcelona ku nshuro ya gatatu, nyuma yo kuyiyobora bwa mbere hagati ya 2003 na 2010, akagaruka mu 2021, akaba agiye gukomerezaho imyaka 5 iri imbere.
NIYOMWUNGERI Obed/TheKaminuzaStar