Myugariro w’umwongereza ukinira ikipe ya Chelsea akanaba Kapiteni wayo, Reece James, yamaze kongera amasezerano mashya y’imyaka itandatu, azamugeza mu mwaka wa 2032 akiri umukinnyi w’iyi kipe yo mu Bwongereza.
Uyu myugariro ukina ku ruhande rw’iburyo yinjiye mu ishuri ry’umupira w’amaguru rya Chelsea akiri muto, afite imyaka itandatu. Nyuma yaje gutizwa mu ikipe ya Wigan Athletic yo mu Bwongereza kugira ngo abone umwanya wo gukina, mbere yo kugaruka muri Chelsea mu 2018.
Ubuyobozi bwa Chelsea bwafashe icyemezo cyo kongerera amasezerano James bitewe n’umusaruro akomeje gutanga mu kibuga ndetse n’uburyo ayobora bagenzi be nk’umwe mu bayobozi b’iyi kipe. Nubwo yakunze guhura n’ibibazo by’imvune mu bihe bitandukanye, aracyafatwa nk’umwe muri ba myugariro beza ku ruhande rw’iburyo ku Isi.
Amakuru y’aya masezerano mashya yatangajwe ku wa 13 Werurwe 2026, nk’uko byagaragajwe n’ikinyamakuru The Athletic. James w’imyaka 26, wavutse mu 1999 mu Bwongereza, ni umwe mu bakinnyi ngenderwaho ba Chelsea ndetse n’ikipe y’igihugu y’Ubwongereza “Three Lions”.
Kuva yazamuka mu ikipe nkuru ya Chelsea, Reece James yafashije iyi kipe kwegukana ibikombe bitandukanye birimo: UEFA Champions League, UEFA Super Cup na FIFA Club World Cup begukanye mu ntangiriro z’uyu mwaka batsinze Paris Saint Germain ku mukino wa nyuma.
Kumwongerera amasezerano biri mu mugambi w’ubuyobozi bwa Chelsea wo kubaka ikipe ikomeye y’igihe kirekire, igendeye ku bakinnyi b’inkingi za mwamba bafite ubushobozi n’ubunararibonye mu guhatanira ibikombe bikomeye.
NIYONZIMA Jean Bosco/TheKaminuzaStar