Urukiko rw’Ibanze rwa Kicukiro rwakatiye igifungo cy’imyaka itatu n’ihazabu ya miliyoni eshatu abarimo Uzabakiriho Cyprien uzwi nka Djihad, Kalisa John uzwi nka Kjohn, Kwizera Papy Nestor na Ishimwe François Xavier mu gihe Ishimwe Patrick uzwi nka Pazzo Man we yagizwe umwere ku byaha byo gusakaza amashusho y’urukozasoni y’umuhanzi Yampano yashyizwe hanze mu mpera za 2025.
Kuri uyu wa Gatanu tariki ya 27 Gashyantare 2026, ni bwo Urukiko rw’Ibanze rwa Kicukiro rwakatiye abo bane bashinjwaga gusakaza no gushyira hanze amashusho y’urukozasoni y’umuhanzi Yampano mu gihe uwa gatanu we yagizwe umwere.
Umucamanza yavuze ko igenzura ry’ibimenyetso byatanzwe n’inzego z’iperereza, byari bishingiye ku ikoranabuhanga, byagaragaje ko abakatiwe bagize uruhare runini mu ikwirakwizwa ry’amashusho y’urukozasoni ya Uworizagwira Florient uzwi nka Yampano.
Raporo ya gihanga yakozwe n’urwego rushinzwe iperereza ku byaha by’ikoranabuhanga mu rubanza rwabereye mu Rukiko rw’Ibanze rwa Kicukiro yerekanye ko hari bamwe muri abo bane bakatiwe bashinze amatsinda ya WhatsApp yari asanzwe anyuzwamo amashusho y’urukozasoni ndetse ko ayo matsinda ariyo yaje gukwirakwizwamo amashusho y’umuhanzi Yampano.
Ishimwe Patrick uzwi nka Pazzo Man, urukiko rwamugize umwere nyuma yo kwemezwa ko yabonye amashusho y’urukozasoni ya Yampano ayahawe, ndetse ko nta gihamya cyabonetse kigaragaza ko nyuma yo kuyabona yaba yarayakwirakwije.
Urukiko rwanzuye ko abashaka kujurira batanga ubujurire bitarenze iminsi 30 kugira ngo urubanza rusubirwemo, mu gihe haba hari uruhande rwaba rutanyuzwe n’imyanzuro urukiko rwafashe.
Iyi dosiye itoroshye na gato yatangiye ku wa 9 Ugushyingo 2025, nyuma y’uko umuhanzi Yampano yatangaga ikirego mu Rwego rw’Ubugenzacyaha RIB, arega abarimo Kjohn na bagenzi be gusakaza amashusho ye y’urukozasoni, ibintu byatumye batangira gutabwa muri yombi hagati ya 11 na 26 Ugushyingo 2025.
Ibyaha Uzabakiriho Cyprien uzwi nka Djihad, Kalisa John uzwi nka Kjohn, Kwizera Papy Nestor (Papy Nesta), Ishimwe François Xavier na Ishimwe Patrick uzwi nka Pazzo Man bakurikiranyweho bishingiye ku Itegeko No 60/2018 ryo ku wa 22/8/2018 ryerekeye gukumira no guhana ibyaha bikoreshejwe ikoranabuhanga.
Iri tegeko mu ngingo yaryo ya 34 rivuga umuntu wese, utangaza, wohereza cyangwa utuma hatangazwa ubutumwa ubwo ari bwo bwose bw’urukozasoni akoresheje mudasobwa, cyangwa urusobe rwa mudasobwa, aba akoze icyaha, iyo abihamijwe n’urukiko ahanishwa igifungo kitari munsi y’imyaka itatu ariko kitarenze itanu, n’ihazabu iri hagati ya miliyoni 1 Frw na miliyoni 3 Frw.
MUHIRE Jean Berchmas/TheKaminuzaStar