Abagororwa 266 bagiye gusoza ibihano byabo ku byaha bya Jenoside yakorewe Abatutsi batangiye amahugurwa agamije kubafasha kwitegura gusubira mu buzima busanzwe, kongera kwiyubaka no kubana neza n’imiryango ndetse n’abaturage muri rusange.
Aya mahugurwa yatangijwe kuri uyu wa 23 Gashyantare 2026 mu Karere ka Nyamagabe, aho ategerejweho gufasha aba bagororwa kwakira impinduka bazasanga hanze no kwinjira mu muryango nyarwanda biteguye kubaka amahoro n’ubwiyunge.
Abitabiriye aya mahugurwa bangana na 266, barimo abagore 101 n’abagabo 165, Baturuka mu magororero atandukanye arimo Nyamagabe (65), Huye (79), Rwamagana (44), Nyarugenge (22), Ngoma (20), Nyanza (18), Rusizi (4), Bugesera (3), Rubavu (3) na Musanze (2). Aya mahugurwa azasozwa ku wa 18 Werurwe 2026.
Bamwe mu bagiye kurangiza ibihano bavuga ko aya mahugurwa ari intambwe ikomeye mu rugendo rwo gusubira mu buzima busanzwe. Bahamya ko biteguye gusubira mu miryango yabo, bagasaba imbabazi abo bahemukiye no kubana na bo mu mahoro nk’Abanyarwanda.
Iki ni icyiciro cya karindwi cy’aya mahugurwa ategurwa mu rwego rwo gufasha abagororwa bagize uruhare muri Jenoside yakorewe Abatutsi kwitegura ubuzima bwo hanze ya gereza.
Mu byigishwa harimo kwakira no kumenyera impinduka, gufata ibyemezo bishingiye ku buringanire n’ubwuzuzanye bw’umugabo n’umugore, gusobanukirwa icyerekezo cy’igihugu no kukigiramo uruhare binyuze mu bikorwa by’iterambere n’imibanire myiza.
Umuyobozi Nshingwabikorwa w’Ishami ry’Ubumwe n’Ubudaheranwa muri Minisiteri y’Ubumwe bw’Abanyarwanda n’Inshingano Mboneragihugu, UWERA Kayumba Marie Alice, yasabye aba bagororwa kuzitwara neza nibagera mu miryango yabo, bakirinda ingengabitekerezo ya Jenoside yakorewe Abatutsi kandi bakarangwa n’ukuri.
Yabashishikarije kandi kurera neza abakiri bato, babatoza indangagaciro z’ubumwe n’amahoro no kwirinda urwango n’amacakubiri.
Aya mahugurwa ategerejweho gutanga umusanzu mu gukomeza kubaka ubumwe n’ubudaheranwa, no gufasha abagororwa barangije ibihano kwinjira neza mu muryango nyarwanda.
HANYURWIMFURA Olivier/TheKaminuzaStar