Ba ofisiye 81 bo mu Ngabo z’u Rwanda barangije amasomo yabo mu Ishuri Rikuru rya Gisirikare rya Gako, bahawe impamyabumenyi y’icyiciro cya kabiri cya kaminuza, basabwa gukoresha ubumenyi bahawe mu guhangana n’ibibazo bikomeye byugarije Isi mu ngeri zitandukanye
Izi mpamyabumenyi zatanzwe kuri uyu wa Mbere, tariki ya 4 Kanama 2025, mu muhango wabereye mu Karere ka Bugesera, ku cyicaro cy’iri shuri rikuru, mu gikorwa cyateguwe ku bufatanye na Kaminuza y’u Rwanda.
Ni umuhango witabiriwe n’abarimo, Minisitiri w’Ingabo, Juvenal Marizamunda; Umugaba Mukuru w’Ingabo z’u Rwanda, Gen Mubarakh Muganga; Minisitiri w’Uburezi, Nsengimana Joseph; ndetse n’Umunyamabanga Mukuru w’Urwego rw’Igihugu rw’Ubugenzacyaha (RIB), Col Pacifique Kayigamba Kabanda.
Minisitiri Marizamunda, wari uyoboye uyu muhango, yashimangiye ko aba basirikare basoje amasomo, bitezweho byinshi n’igihugu.
Ati “Mu gihe muvuye hano, mufitiwe icyizere n’Igihugu cyose. Nk’abasirikare bigishijwe, muzirikane ko mwinjiye mu Isi ihinduka, irimo ibibazo bishingiye ku bujura bw’ikoranabuhanga n’imihindagurikire y’ibihe. Uburezi mwahawe nizeye ko bwabateguriye guhangana n’ibibazo biri hanze aha.”
“Ahazaza ni ahanyu, mukomeze mukore mufite imbaraga n’intego, muharanire iterambere ry’Igihugu.”
Umuyobozi w’Ishuri Rikuru rya Gisirikare rya Gako, Brig Gen Franco Rutagengwa, na we yibukije aba basoje amasomo ko indangagaciro z’umwuga wa gisirikare ari zo zizabafasha mu nshingano zabo.
Ati “Aba bakobwa n’abahungu bagaragaje ubuhanga budasanzwe mu masomo yabo. Bafite ubumenyi burimo ubusanzwe n’ubwa gisirikare, ndetse bashobora guhangana n’ibibazo byugarije sosiyete.”
Yakomeje agira ati “Twizeye ko muzakora inshingano zanyu mu bushishozi. Ubumenyi mwahawe ni intangiriro yo kubaka igisirikare gihamye, kubahiriza inshingano z’ubuyobozi no kurinda abaturage.”
Muri aba barangije amasomo, 20 bafite ipeti rya Lieutenant bize Ubuvuzi, mu gihe 61 bafite ipeti rya Sous-Lieutenant bize ibijyanye n’Ubuhanga mu bya Gisirikare n’Ubumenyamuntu.
Abanyeshuri babiri barushije bagenzi babo bahawe ibihembo byihariye: Lt Dr Eugene Parfait Ruhirwa wize Ubuvuzi no Kubaga, na Sous Lieutenant Christian Izere wize ibijyanye n’Ubuhanga mu bya Gisirikare n’Ubumenyamuntu.
Kuva mu 2015, Ishuri Rikuru rya Gisirikare rya Gako rifatanya na Kaminuza y’u Rwanda mu gutanga amasomo y’icyiciro cya kabiri cya kaminuza mu mashami arimo Ubuhanga mu bya Gisirikare, Ubumenyamuntu n’Ubuvuzi.
Guhera mu 2020, hongewemo amashami mashya arimo Imibare, Ubugenge, Ibinyabuzima, Amategeko, Ubuforomo n’Ubukanishi, agamije gutanga ubumenyi bujyanye n’ibikenewe muri iki gihe.
ISHIMWE Yarakoze Seth Kefa / The Kaminuza Star