Ikigo cy’Igihugu cy’Ibarurishamibare (NISR) cyatangaje ko ibiciro ku masoko byazamutseho 7.7% muri Gicurasi 2025 ugereranyije na Gicurasi 2024.
Ibi byatangajwe kuri uyu wa 10 Kamena 2025 mu mibare yashyizwe ahagaragara n’icyo kigo.
NISR ivuga ko iri zamuka ryatewe cyane cyane n’ibiciro by’ibiribwa n’ibinyobwa bidasembuye byazamutseho 10%, ibinyobwa bisembuye n’itabi byazamutseho 7.2%, ndetse n’amafunguro n’icumbi byazamutseho 13.5%.
Mu byaro, ibiciro byazamutse kurusha mu mijyi, aho byiyongereyeho 8.2%. Iri zamuka rishingiye ku biribwa n’ibinyobwa bidasembuye byahenze kurushaho, byazamutseho 10.3%, ndetse n’ibinyobwa bisembuye n’itabi byazamutseho 7.1%.
Mu mijyi ho ibiciro byazamutseho 6.9%, bishingiye cyane cyane ku biribwa n’ibinyobwa bidasembuye byazamutseho 9.2%, ibiciro by’amazi, amashanyarazi, gazi n’ibindi bicanwa byiyongereyeho 3.3%, iby’ubwikorezi byazamutseho 3.7%, mu gihe amafunguro n’icumbi byazamutseho 16.6%.
Ugereranyije Gicurasi na Mata 2025, ibiciro ntibyahindutse ku rwego rw’igihugu hose.
Mu byaro ho, ugereranyije na Mata, ibiciro byagabanutseho 0.4%. Iri gabanuka ryatewe n’uko ibiciro by’ibiribwa n’ibinyobwa bidasembuye byagabanutseho 1.2%.
Ni mu gihe mu mijyi ibiciro byiyongereyeho 0.6% ugereranyije na Mata, bitewe n’uko ibiciro by’ibiribwa n’ibinyobwa bidasembuye byiyongereyeho 0.5%.
MASENGESHO Ruben / The Kaminuza Star