Umuhanzi Nemeye Platini yashyize ahagaragara indirimbo yitwa 2009, igaruka ku rugendo rwe mu muziki ndetse n’imbogamizi yahuye na zo mu buzima bwe bwite n’ubw’umwuga, burimo gutandukana n’uwari umugore we Ingabire Olivia n’igenda rya TMC bahoranye mu itsinda rya Dream Boyz.
Iyi ndirimbo y’umuhamya w’ibyabaye mu myaka 16 amaze mu ruganda rw’umuziki nyarwanda, agiye hanze mu gihe Platini P ari mu myiteguro yo gushyira hanze “album” ye nshya yakoranye na Nel Ngabo yise “Vibranium”, biteganyijwe ko izajya hanze muri Nyakanga 2025.
Mu magambo yihariye y’ubuhanga, Platini yifashishije indirimbo 2009 nk’inzira yo gusubiza amaso inyuma, agaruka ku ntangiriro y’urugendo rwe rw’umuziki mu 2009.
Yashimiye Lick Lick wamufashije mu ntangiriro, ndetse anavuga ku bundi bufasha yagiye ahabwa n’abantu batandukanye barimo Davydenko na Element.
Iby’ingenzi biri muri iyi ndirimbo, ni ubutumwa bukomeye nk’aho agaruka ku bibazo by’umubano we n’uwahoze ari mugenzi we mu itsinda Dream Boyz, TMC. Platini avugamo ko nubwo TMC yamusize agiye gukomeza amasomo muri Leta Zunze Ubumwe za Amerika, we yakomeje urugendo rw’umuziki ku giti cye, anavuga ko amagambo yavuzwe n’abatandukanye atigeze amuca intege.
Ati “Natawe imihanda ndabyimenyera, inshuti ziraza zikagenda, Indatwa yantabye mu nkiko, bless Mendez ntiwamvuyeho.”
Uyu murongo ugaragaza uko yahuye n’akaga n’amagambo mabi y’abantu, ariko akiyemeza kudacika intege.
Indirimbo ye kandi igaruka ku itandukana rye n’umugore we Ingabire, aho yerekana ko ari ibihe bikomeye yanyuzemo ariko bikamubera isoko yo gukomera kurushaho.
Platini na Ingabire barushinze muri Werurwe 2021, batandukana muri Gashyantare 2025. Amakuru ya IGIHE avuga ko mu rugo rwabo havutse umwana muri Nyakanga 2021, ariko hakabaho impaka ku bupapa bw’uyu mwana, ari nabyo byabaye intandaro y’amakimbirane yabaye ku mugaragaro.
Mu magambo ye bwite, Platini yasobanuye ko ibibazo by’umuryango bikemurirwa mu muryango, avuga ko atari ngombwa ko byose bijya mu itangazamakuru, nubwo rimwe na rimwe bigenda bisakara biva mu nshuti za hafi.
Indirimbo 2009 igaragaza ishusho y’ukuri ku buzima bw’umuhanzi Platini P yerekana uko yabonye intangiriro y’umuziki we, uko yaciye mubihe bikomeye mu rukundo no mu bucuti, ariko agakomera ku nzozi ze.
Platini P abinyujije muri 2009, aratanga isomo ryo kudacika intege, aho agaragaza ko ibikomere byabaye imbarutso yo gukura no gukomera kurushaho gukora umuziki mwiza.
MUHIRE Jean Berchmans / The Kaminuza Star