Umuhanzi w’Umunya-Afurika y’Epfo, Tyler ICU, azataramira mu Rwanda tariki ya 30 Gicurasi 2025, mu gitaramo kizabera muri Kigali Universe. Kwinjira bizaba ari 10,000 Frw mu myanya isanzwe na 15,000 Frw muri VIP.
Iki gitaramo cyateguwe na The Groove Rwanda, kikazaba kirimo n’abavanga umuziki (DJs) barimo DJ June na DJ Inno. Abinyujije ku rukuta rwe rwa Instagram, Tyler yemeje ko azaza mu Rwanda akubutse muri Uganda.
Tyler ICU azaba agarutse i Kigali ku nshuro ya gatatu, nyuma yo kuhataramira bwa mbere muri Kanama 2023 kuri Atelier du Vin, ndetse no ku wa 31 Ukuboza 2024, mu birori byo gusoza umwaka.
Uyu muhanzi wubatse izina binyuze mu ndirimbo nka Mnike, Jealousy na Manzi Nte, aherutse kwegukana igihembo cy’Umuhanzi Mwiza (Best Artist) mu bihembo bya Trace Awards byabereye muri Zanzibar ku wa 26 Gashyantare 2025, kubera ubuhanga bwe mu njyana ya Amapiano.
GATUNGANE Bella Sandrine / The Kaminuza Star