Igitego cya Biramahire Abeddy cyafashije ikipe ya Rayon Sports gutsinda Mukura Vs, ihita ibona itike yo kuzakina umukino wa nyuma w’Igikombe cy’Amahoro na APR FC.
Ni mu mukino wabaye kuri uyu wa Gatatu tariki ya 30 Mata 2025, umukino ubanza wari wahuje aya makipe kuri Stade ya Huye wari warangiye ari 1-1
Abatoza b’amakipe yombi bari bahisemo abakinnyi baza kwifashisha muri uyu mukino wa ½ cy’Igikombe cy’Amahoro.
Buri wese yatoranyije 11 beza kurusha abandi yizeye ko bamufasha kwegukana intsinzi akagera ku mukino wa nyuma.
Rwaka Claude usigaye utoza Rayon Sports yari yahisemo kubanza kibuka abakinnyi barimo: Umutoza Rwaka Claude yahisemo gukinisha: Ndikuriyo Patient, Serumogo Ali, Bugingo Hakim, Omar Gning, Youssou Diagne, Souleymane Daffe, Kanamugire Roger, Muhire Kevin, Biramahire Abeddy, Aziz Bassane na Rukundo Abdul Rahman.
Mu gihe Mukura VS itozwa na Afahmia Lotfi yari yabanje mu kibuga abakinnyi barimo: Sebwato Nicholas (c), Abdul Jalilu, Ishimwe Abdoul, Hakizimana Zuberi, Uwumukiza Obed, Rushema Chris, Ntarindwa Aimable, Oladosu Samson, Jordan Dimbumba, Boateng Mensah na Malanda Destin.
Saa Moya n’igice muri Stade Amahoro yarimo abafana bakabaka ibihumbi 25, nibwo abasifuzi bayobowe na Rulisa Patience batangije umukino, utangizwa na Rayon Sports, rutahizamu wayo Biramahire Abeddy awuha kuri bagenzi be.
Rayon Sports batazira Murera niyo yatangiye yinjira mu mukino neza kuko ku munota wa Muhire Kevin yahinduye umupira mwiza mu rubuga rw’amahina, Biramahire Abeddy agiye kuwutsinda ukurwamo na Sebwato Nicolas.
Muhire yongeye gutera irindi shoti, umupira ujya hejuru y’izamu gato.
Ku munota wa 20, rutahizamu wa Mukura, , Boateng Mensah yanze gukinana n’abagenzi be ubwo bahererekanyaga umupira bashaka amahirwe yo gutsinda.
Ku munota wa 36, Rayon Sports yari yakije umuriro yahushije igitego kidahuswa ubwo Biramahire Abeddy yinjiraga mu rubuga rw’amahina wenyine ahawe umupira mwiza na Rukundo Abdul Rahman.
Abeddy yifoye ateye ishoti umupira ukubita umutambiko w’izamu.
Iminota 45 y’igice cya mbere n’inyongera z’iminota itatu byarangiye ari 0-0. Abatoza n’abakinnyi bajya kongera kuganira.
Igice cya kabiri cyatangiye ikipe ya Mukura VS ishaka gutsinda igitego.
Ku munota wa 48, Uwumukiza Obedy ahinduye umupira mwiza mu rubuga rw’amahina, Boateng Mensah awukinishije umutwe, ufatwa neza na Ndikuriyo Patient, umuzamu wa Rayon Sports.
Ku munota wa 50, Muhire Kevin yasubije umupira inyuma, Destin Malanda arawukurikira, umunyezamu Ndikuriyo arawumushota, ku bw’amahirwe ujya hanze kuko izamu ryari ryambaye ubusa.
Ku munota wa 73, Rayon Sports yabonye igitego ubwo Biramahire Abeddy yatsindaga igitego ubwo yari ahawe umupia na Serumogo Alli wazamutse ku ruhande agenda nk’icyogajuru.
Umukino warangiye Rayon Sports icyuye intsinzi y’igitego kimwe ku busa, igana ku mukino wa nyuma w’Igikombe cy’Amahoro aho izakina na APR FC ku Cyumweru tariki ya 4 Gicurasi 2025.
MUGIRANEZA THIERRY/ THE KAMINUZA STAR