Ihuriro rya Alliance Fleuve Congo/March 23 Movement (AFC/M23) ryashyikirije Ingabo z’u Rwanda (RDF) itsinda ry’abasirikare baturutse mu mutwe wa FDLR (Forces Démocratiques de Libération du Rwanda), bafashwe mu bikorwa bya gisirikare byabereye mu Burasirazuba bwa Repubulika Iharanira Demokarasi ya Congo (DRC).
Uyu muhango wabaye kuri uyu wa Gatandatu tariki ya 1 Werurwe 2025, ku mupaka wa Grande Barrière, mu karere ka Rubavu.
Abasirikare bashyikirijwe u Rwanda ni Brig Gen Jean Baptiste Gakwerere, Maj Gilbert Ndayambaje, SM Nsabimana August, Sgt Mupenzi JMV (umurinzi wa Brig Gen Gakwerere), Cpl Sibomana Laurent, Cpl Ishimwe Patrick, Cpl Ibyimanaikora Concorde, Cpl Ukwishaka Sadam, Cpl Hategekimana Eric, Pte Ndayambaje Pascal, Pte Nkundno Daniel Desire, Pte Ntakirutimana Niyonzima, Pte Ndayambaje Fabien na Pte Uwiduhaye Gilbert
Itangaza RDF yashyize hanze ku gicamunsi, rivuga ko amakuru aturuka muri aba basirikare bafashwe agaragaza ko bari bafitanye ubufatanye bukomeye n’ingabo za FARDC, Wazalendo, SAMIDRC ndetse n’abasirikare ba ba (mercenaries).
Iri tangazo rikomeza rivuga ko hari andi makuru ko abasirikare ba FDLR bimukiye mu bice bya Walikare, Lubero, Mwenga, n’ahandi, mu gihe bishoboka ko igice kimwe cy’aba basirikare ba FDLR kikiri mu turere tukiri mu maboko ya M23.
Col Joseph Mwesigye uyobora burigade ya 509 mu ngabo za RDF mu Turere twa Rubavu, Ngororero na Nyabihu, uri mu bakiriye aba basirikare ba FDLR yagize ati “Turabaha inzego zibishinzwe bagende bakurikiranwa umwe ku wundi, niba hari ufite ibyaha bya jenoside ashyikirizwe ubutabera, niba hari ukurikiranweho ibindi byaha na we ashyikirizwe izindi nzego zibireba.”
Umutwe wa FDLR ugizwe n’ingabo zahoze ari iza leta yakoze Jenoside yakorewe Abatutsi mu Rwanda mu 1994, bagahungira muri Repubulika Iharanira Demokarasi ya Congo nyuma yo gutsindwa n’ingabo za RPF-Inkotanyi.
AFC/M23 ni umutwe washinzwe uvuga ko uharanira uburenganzira bw’Abanye-Congo bavuga ururimi rw’Ikinyarwanda, bashinjaga leta ya Joseph Kabila kubakorera ivangura by’umwihariko abo mu bwoko bw’Abatutsi, ndetse ko baba banagamije kubirukana ku butaka bwabo barazwe n’abasokuruza.
Imfuranzima Domitien/ The Kaminuza Star