Munyarugendo uyobora Radio Salus yagaragaje icyo ubwiganze bwayo mu bihembo bya DJA bisobanuye

By
The Kaminuza Star
-

Umuyobozi wa Radio Salus, Munyarugendo Athanase, yagaragaje ko ibihembo bitanu abanyamakuru b’iyi radiyo baherutse kwegukana muri Developmental Journalism Awards (DJA) 2024, ari ikimenyetso cyiza n’intambwe idasubira inyuma ku ntego ngari iki gitangazamakuru cyihaye.

Tariki ya 7 Ukwakira 2024, ni bwo Ihuriro ry’Abanyamakuru mu Rwanda (ARJ) ku bufatanye n’Urwego rw’Igihugu rw’Imiyoborere (RGB), bahembye abanyamakuru babaye indashyikirwa mu gutegura inkuru nziza mu byiciro bitandukanye, maze Radio Salus yegukanamo ibihembo bitanu.

Abanyamakuru ba Radio Salus bahembwe ni Habineza Venuste wahize abandi mu cyiciro cy’isuku n’isukura; Umutoni Marie Jeanne wabahize mu nkuru ivuga ku ihohoterwa rishingiye ku gitsina n’irikorerwa abana; Kazungire Merci Dieu mu cyiciro cy’ubukungu; Patrick Rurangangabo mu gukumira inda ziterwa abangavu; ndetse na Tembasi Alice wabahize mu buringanire n’ubwuzuzanye hagati y’abagabo n’abagore.

Munyarugendo  yagaragaje ko ibi bihembo ari ikimenyetso cyiza no kuzirikana umusanzu w’iyi radiyo mu guhugura abaturage no kubakorera ubuvugizi.

Ati “Ibi bihembo bigaragaza umuhate wa Radio Salus mu kwigisha sosiyete; ikaba n’imwe mu ntego zacu z’ibanze. Ibi kandi ni ikirango no guha agaciro imbaraga zacu mu kuzamura ubukangurambaga ku bibazo by’ingenzi mu byiciro nk’isuki n’isukura, uburenganire n’ubwuzuzanye ndetse n’ingaruka z’inda ziterwa abangavu.”

Yasoje avuga ko iyi radiyo abereye umuyobozi itazatezuka ku mwimerere wayo.

Ati “Radio Salus izakomeza kuba isoko y’amakuru yizewe muri gahunda zayo zishyize imbere kwigisha abadukurikira.”

Munyarugendo Athanase [uwa gatatu uhereye iburyo] avuga ko ibi bihembo ari ikimenyetso cyiza no kuzirikana umuhate wa Radio Salus mu gutangaza amakuru afitiye abaturage akamaro
Kuva mu ishingwa ryayo, Radio Salus ya Kaminuza y’u Rwanda ifatwa nk’uruganda runagurirwamo abanyamwuga mu itangazamakuru, aho baturuka mu banyeshuri bo mu Ishuri ry’Itangazamakuru n’Itumanaho; ibigaragazwa n’uko mu bitangazamakuru byo mu Rwanda haba higanjemo abatojwe na yo.

Radio Salus yumvikanira ku mirongo ibiri ya FM; 97.0 ndetse na 101.9.

Yashinzwe mu 2005, ihita itangira inshingano zayo, ndetse muri uku kwezi k’Ugushyingo, ihanze amaso ibirori ngarukamwaka byo kwizihiza igihe imaze ishinzwe. Kuri iyi nshuro bikazaba ari ibyishimo by’imyaka 19.

Radio Salus ni yo yegukanye ibihembo byinshi

Nirere Jean Claude/TheKaminuzaStar